中環出更：樂善堂設食物銀行 基層領「鮮」
近日政府撥款支援食物銀行，減低基層家庭經濟負擔。九龍樂善堂主席韓世灝（Johnny）月前就同地產商合作成立食物銀行，以天水圍及將軍澳做試點，派發食物券予市民換取新鮮食物，為期半年嘅計劃預計有五百個家庭受惠。Johnny坦言，如果計劃效果理想，會推展至更多地區。
樂善堂早前舉行一個慈善首映活動，Johnny同副主席羅永順、梁紹安（Clifford）、施家殷兄弟班齊現身。曾經喺英國劍橋大學研究腦退化症嘅Johnny話，早年已意識到社會人口老化加劇，所以加入咗該堂後，逐步推行連串針對長者嘅服務。佢話，一般食物銀行嘅資助係暫時性及以罐頭、乾糧為主，老人家同小孩長期食用容易營養不良，所以該堂設立嘅食物銀行，會鼓勵市民換取新鮮食物，食得健康，醫生都睇少啲。
Clifford帶埋大仔梁俊鴻及細仔梁德鴻出席活動，佢加入該堂已近十年，已故父親都服務過該堂，將來會叫埋兩個囝囝加入，將善心代代相傳。卓妮仲見到香港青年聯會賢慧社主席羅詠詩（Anthea）、成員張詩培（Joanne）及仁愛堂總理劉業光太太畢麗君，Anthea話自己同Johnny好老友，所以拍心口出任該堂嘅當年總理。
留學三書友 仔女續前緣
Anthea仲自爆話，佢老公黎藉冠、劉業光同上屆主席鄺祖盛係英國留學時嘅書友，咁啱依家三人嘅子女又同期去英國留學，認真有緣。Joanne就笑言，多得Anthea穿針引線，下月將「升呢」做青聯常務會董。
卓妮