超級神棍陳振聰貪得無厭，企圖利用偽造遺囑騙取亞洲女首富龔如心遺產八百幾億元，密謀將撥作慈善用途嘅巨額財富據為己有，法官形容為邪惡同無恥，然後重判入獄十二年，呢單矚目全球嘅爭產案係人都覺得被告罪有應得，騙子入獄大快人心。之但係咁，若然有人因為袋咗一元硬幣而惹上官非，大家又點睇呢？又假如，有人牽涉以權謀私，動用數以十萬元計嘅公帑買酒迎賓，至今依然逍遙法外，大家又點諗呢？
前一排喎，有一名隧道收費員，只不過工作期間將一蚊雞放入褲袋，跟手就被執法人員告上法庭，司法人員一錘定音，盜竊罪名成立，守行為兩年兼付一千元堂費。代價更加沉重嘅係呢位「一蚊雞小偷」被炒魷魚，痛失飯碗之餘連退休金都化為烏有。
小市民由於雞毛蒜皮嘅所謂利益而一身蟻，反觀前特首曾蔭權以及前廉政專員湯顯明，兩人同樣貪腐醜聞纏身，兩人同樣受到廉署調查，無奈嘅係，兩人直至今時今日仍然未被檢控，查來查去照舊未查出個依法嚴懲。身為小市民嘅大家，少不免產生一個疑問，莫非刑不上大夫？喂，無權無勢就告到甩肺，有權有勢就毋須閉翳，非常之咁唔啱數啫，有違法律面前人人平等嘅文明原則喎！
「東方報業民意調查」顯示，對於小職員貪一蚊而被控盜竊，執法人員對小數目窮追猛打，三成七受訪者狠批執法部門只識打小市民，對貪官放軟手腳；三成四認為小題大做；一成八不滿當局處事僵化浪費公帑。至於案情嚴重得多嘅貪曾咯喎，廉署調查一年有多仍然冇交代，三成九受訪者質疑係刻意包庇；三成五斥責廉署嘅調查畏首畏尾令人失望；兩成一認為高官知法犯法應該罪加一等。
咦咦咦，幾乎忘記咗一件事，曾經有一位的士司機因為多收乘客五毫子而被控濫收車資，執法人員已經啟動咗檢控程序(o架)喇，只不過臨門一腳先至可能因為覺得實在太過無聊，所以若無其事撤銷控罪。亦即係話，一隻小螞蟻幾乎死於大殺傷力武器之下，人哋殺雞都唔使用牛刀啦，港產官老爺殺蟻竟然諗過用大炮！
湯顯明當然唔係螞蟻啦，佢係一隻嗜好杯中物嘅醉貓大老虎，體積比螞蟻大得多。對於貪湯尚未被檢控，三成六受訪者直斥司法雙重標準；三成五狠批官官相護，調查雷聲大雨點小；兩成五覺得高官犯法並非與庶民同罪。
講真吖，曾蔭權三個字實在大吉大利，蔭權蔭權，蔭庇權貴，司法不公嘅情況之下，徇私枉法無往而不利！