政情:有相為證:「厚」愛妻子

利希慎家族後人、馬會大董利子厚(Michael)自從去年中迎娶外蒙古籍Munkhzul Odkhuu為妻後,一下子由「鑽石王老五」變身「愛妻號」。繼日前我哋見佢喺中環ifc一間超市選購燒烤食材,招呼遠道而來嘅舅仔,早幾日又見佢現身同一間超市購物,佢話要買食材畀愛妻做早餐喎,真係sweet到暈。

七一公眾假期晚上七點半,身穿恤衫西褲嘅Michael單拖現身超市,佢推住個購物籃四圍行。大約十分鐘後,Michael推住一大籃食物到收銀處付款,滿載而歸。

我哋上前同Michael打招呼,佢話嚟買嘢畀太太第二日做早餐。Michael話佢自己好少食早餐,所買嘅食物,全為太太而設喎,相信全世界女士聽到,都會冧到爆。