政情：甯漢豪陳松青齋「播帶」 論壇舌戰 高官啞火
新界東北發展計劃終極方案出爐，政府尋日派出兩名重量級高官出戰城市論壇，分別係地政總署署長甯漢豪同發展局副秘書長陳松青，對抗粉嶺北農村及居民聯席成員卓佳佳同土地監察主席李永達。原本以為要上演一場唇槍舌劍大戰，點知兩個官員講來講去，都係重申番日前嘅修訂方案細則。
卓佳佳火力猛
甯漢豪話，符合條件私人土地業主要補地價兼向佔用人及租客賠償，先可申請原址換地，政府不嬲都接受改變土地用途申請，每年都有七十幾宗，唔係官商勾結。
卓佳佳隨即質疑，無細則監管賠償，有業主走數，到時政府都無得管。甯漢豪就呼籲村民如果拎唔到政府訂立賠償嘅金額，就要向署方反映，並承諾唔處理呢啲業主嘅申請。
輪到李永達再開火，佢鬧爆新界東北發展係加強版嘅官商勾結，佢話用依家嘅地價去補錢，梗係平啦，但去到咩都起好晒，地產商再高價賣樓，斷估都賺過千億，唔怪得恒基股價升成百分之六。
甯漢豪無力還擊，淨係話土地併購幾時都有，政府唔會干預囉。至於陳松青全程少講嘢，講親都係重複吓啲政策，火力更弱。