政情：揀客家菜有弦外之音？發叔最鍾意釀涼瓜
香港客屬總會尋日喺大埔林村舉辦客家美食嘉年華，本來預計有二千五百人齊吃客家菜，可惜天公不造美，活動開始前突然遇上黃色暴雨警告，大雨之下搞到最後遲咗成個鐘先開始，有參加者更加因為等得耐唔舒服而要召白車到場添。唔知大雨係咪打亂埋大會嘅計劃，工作人員除咗將國旗、區旗掉轉掛，仲因為溝通混亂而令原先擔任主禮嘉賓嘅特首梁振英（CY）缺席活動。
溝通混亂 CY折返
一場黃雨搞到溝通混亂。據特首辦所講，原先CY都諗住冒雨出席，但大會初時決定腰斬活動，仲叫去緊林村嘅CY折返，所以CY先至無去。CY無到，但好多人都去咗，包括前全國人大常委曾憲梓，佢坐輪椅到場支持今次活動搞手、佢嘅公子曾智明，佢呼籲客家人堅定愛國之餘，仲帶領台下眾人高唱《沒有共產黨就沒有新中國》。
大會尋日特地準備幾款地道客家菜，邀請台上嘉賓試味，劉皇發望勻枱上幾款客家菜後，就話自己最鍾意食釀涼瓜。
提起「涼」字特別敏感，發叔咁多味客家菜唔揀係要揀釀涼瓜，有無特別意思相信只有發叔本人先知嘞。