政情：新仇 舊恨 工記突襲民記
港府計劃將東區區議會維園同天后兩個選區撥歸灣仔，早前已獲灣仔區議會一致通過，以為已成定局，點知竟然陰溝裏翻船。工聯會（工記）突然提出把東區十一個選區撥歸予灣仔，竟然仲得到泛民主派議員支持，表面上「十一區方案」係想灣仔同東區議席均分，實際效果卻係大幅削弱一向喺東區獨大嘅民建聯（民記）實力。究竟當局點樣先可以避免順得哥情失嫂意，認真考政治智慧同工夫！
與泛民聯手有前科
去年立法會審議長者生活津貼一役，工聯會同泛民主派聯手同港府討價還價一役，令人歷歷在目，如今半年後工記又同泛民聯手。話說港府最近分別到灣仔同東區區議會諮詢喺東區劃走兩區嘅方案，前者無風無浪得到一致通過，點知話口未完喺東區後欄失火，工記突然喺會上提出「十一區方案」，連同泛民主派區議員及個別獨立議員合共有十多人支持，即係三分一東區區會支持，搞到東區獨大嘅民建聯都唔敢「霸王硬上弓」，最終建議發還當局再考慮議員意見。
有資深地區人士分析，工記呢招認真係「一石二鳥」，因為一旦「十一區方案」成事，民記同工記喺東區實力將大幅拉近，以目前東區區議員數目計算，前者會由十四人銳減至九人，後者則由七人減至六人，倘若第時工記再同泛民有合作協議或眉來眼去，話唔定第時有更多令人意想不到嘅情況喺東區發生。
郭偉強為黨「零的突破」
至於喺「十一區方案」下工記唯一「被轉區」嘅「雙料議員」郭偉強，其實亦身負重任，皆因佢嘅和富選區一旦轉咗去灣仔，將可為工記喺灣仔取得近年「零的突破」，更甚係可為工記喺港島實力進一步擴展做定前期準備工作。
事實上，民記同工記新仇舊恨一堆堆，先有去年九月立法會選舉搶票拉票傳聞不絕，其後民記鍾樹根當選立法會議員後，今年年初辭去東區區議會主席一職，縱使工記多番爭取想分一杯羹，民記依然要霸晒區會正副主席，所以有人對於工記今次突襲示威行為，唔感到好意外喎。