中環出更：冒雨拉頭馬郭少明攞尾彩
馬季眨吓眼就過，尋日沙田馬場舉行煞科賽，唔少名人把握機會入場攞番個尾彩。莎莎國際主席郭少明（Simon）就得償所願，名下愛駒「美麗里程」以四十二倍賠率，爆冷由頭帶到落尾勝出，穩袋五十四萬多元獎金。其時適逢滂沱大雨，Simon同愛妻郭羅桂珍冒雨拉頭馬，擔住遮都全身濕晒，狼狽到極，依然笑到四萬咁口。
其實Simon早兩場已經拉過頭馬，不過跑出嘅係老友「快勞夾大王」杜振源細佬杜振安（William）隻靚駒「飲食之星」。William好雀躍咁話，已經兩、三年冇拉過頭馬，終於喺尾場食胡，仲係出賽以來首度奪冠。佢仲話，會將獎金交畀哥哥，捐畀慈善團體「小母牛」做善事。
名人趁暑假紛外遊
暑假將至，唔少名人計劃外遊。馬會大董兼立法會議員廖長江（Martin）今年忙到陀陀擰，難得有假放，將會同太太及囝囝一家三口，飛往俄羅斯及北歐個人遊散心。Martin話係首次去俄羅斯，此行必去聖彼得堡，事關佢讀大學嘅時候修讀過西洋史，所以想去逛吓當地嘅藝術館同歷史建築。
太子珠寶鐘錶主席鄧鉅明（Jimmy）同老友愛沙尼亞駐港名譽領事林建康（Matthew）都喺度，佢哋兩家人經常孖住外遊，不過今次各有各玩。Jimmy陪愛妻回家鄉昆明探親，Matthew則一家大細坐郵輪歐遊。
卓妮