沒有最醜，只有更醜，消防處話就話係紀律部隊，其實掛羊頭賣狗肉，對於醜聞多多嘅消防官僚嚟講，根本唔知紀律兩個字點寫。
唔係冤枉佢哋o架，淨係過去一年咋，消防處就有八十六人因違反紀律而遭處分，幾乎每百名消防員就有一人違紀，咁樣嘅紀律部隊大家見過未吖？至於消防員違紀嘅行為，可以講係五花八門，無奇不有，有人秘撈，有人當值時賭博，有人毆打同袍，有教官冇按時執教等等，令人嘆為觀止，連前線消防員都話從未見過受罰名單咁長。咁又係吖，消防員嘅職責係救火救人，最講求紀律和效率，依家咁多消防員其身不正，真係聞所未聞，見所未見o架。
本來呢，錯就要認，打就要企定，既然違反紀律咯喎，梗係要接受處分喇，但奇就奇在消防處管理混亂，懲罰更亂，同一類違紀行為，竟然有唔同嘅處分，簡單講即係雙重標準。就以秘撈為例，有人被炒魷，有人只被「譴責」了事，唔怪得有消防員直斥管理層大細超，處分不公喇。
咁都未算吖，有個別消防員無端端中招，違反咗紀律都唔知。例如有人上網留言，本來係好平常嘅事，結果仍受到處分；又例如有人休班時不小心駕駛，已被法庭罰款，最後仍被消防處雙重處分。更恐怖嘅係，內部瘋傳前線人員因早前爭取工時問題而遭部門「搞」，隨時連升級都冇份，咁又算唔算係秋後算帳，製造白色恐怖呢？
講到製造白色恐怖，其實正正係消防官僚嘅慣用伎倆。呢，佢哋不務正業，以收到一封電郵投訴為由，高調派人踩上報館滋擾，咪就係製造白色恐怖，打壓新聞自由囉。功夫茶諗極都唔明，消防處本身問題百出，醜聞多多，已多次被法官炮轟推卸責任，正式係火燒後欄，自顧不暇，居然仲有時間滋擾傳媒，你話係咪本末倒置吖？正所謂，司馬昭之心，路人皆見，消防官僚無事生非，如果話冇不可告人嘅政治目的，細路仔都唔信喇。
始終都係古人講得啱，物必先腐而後蟲生。消防處內部瘋狂違紀，受罰名單水蛇春咁長，主要就係因為管理混亂，包括處長陳楚鑫在內嘅管理層不務正業，敷衍塞責，又點可能唔搞得烏煙瘴氣吖。嗱，正人先正己，要防止消防員違反紀律好易啫，首先整頓管理層，只要佢哋自己做好份工，下屬自然唔敢亂嚟。有人可能會問，消防處管理層腐爛不堪，已經整無可整，咁又點算吖？其實咁仲容易，動手術切除咪一了百了囉。舊嘅唔去，新嘅唔嚟，消防處係時候改頭換面喇！