政情：「小明」衝出香港 東莞開演唱會
外號「小明」嘅兒科醫生李家仁，一首「小明上廣州」唱到街知巷聞，佢明日更會衝出香港，到東莞東城區舉行迷你華南國際演唱會添！身兼香港東莞東城同鄉會會長嘅李家仁話，預料明日演唱會有四百至六百人出席，而佢只係準備咗三日喎。莫非因為日前佢診所爆消防喉，搞到唔夠時間去準備？
紅館開個唱？李家仁賣關子
據聞李家仁呢個衝出香港嘅演唱會，歷時一個多小時，將會唱大約十首歌左右。當問到係咪為第時喺香港紅磡體育館、伊利沙伯體育館等地方舉行演唱會鋪路時，李家仁就大賣關子，話一切留待經理人去決定喎。
李家仁嘅「小明系列」歌曲固然深入民心，但要開演唱會最緊要係儲足歌曲，唔知會否激發佢加緊創作歌曲，為香港開show做好前期準備呢？