政情：被問及男友貪湯 陳詠梅錄音機上身
「貪湯」前廉政專員湯顯明任內被揭濫用公帑買酒、送禮「擦內地鞋」，又曾多次帶同女友、入境處前助理處長陳詠梅（Helen）出席由公帑埋單嘅廉政公署飯局。不過，咪以為男友畀人全城圍攻，Helen就會變成「苦瓜乾」，事實上佢繼續風騷有講有笑，係咪強顏歡笑就只有佢自己至知喇。
出席活動續風騷
「開心企業」標誌頒獎禮活動尋日舉行，久未露面嘅Helen應邀出席做嘉賓，當問及有無同貪湯聯絡時，Helen未有正面回應，強調只會講同活動主題有關嘅事。之後再被追問有無同貪湯聯絡，Helen亦好似「人肉錄音機」上身，重複番之前同一番說話。不過，Helen同其他嘉賓閒聊時都笑容可掬，期間更曾發生一段小插曲。
話說Helen遇到某男嘉賓即將離開，想同另一名男嘉賓合照時，Helen想企喺旁邊，但該名男嘉賓則極力要求Helen企喺中間，此時Helen衝口而出話，咁樣就會拼成一個「嬲」字喎。