政情：商界自律補水 恐「四大」皆空
最低工資立法後，勞工界又要為標準工時立法與僱主展開角力，為超時工作冇補水嘅打工仔女爭取權益。一早表態反對立法嘅四大商會，自知一味反對只會失民心，於是聯同僱主聯合會進行一場大型調查反擊，將超時冇補水嘅行業摷晒出嚟，然後搵相關業界商會以自律方式解決。呢條橋係咪熟口熟面呢？咪係最低工資立法前嘅「工資保障運動」嘅翻版囉，但運動最後都係徹底失敗，依家翻炒爛橋，成效令人懷疑。
商會搞調查 抗標準工時
尋日正式上任嘅工業總會主席劉展灝（Stanley）透露，今次參加調查嘅包括工總、中華總商會、香港總商會及中華廠商聯合會在內嘅四大商會，再加埋僱主聯合會，相信接受調查嘅行業覆蓋面具代表性。佢哋已就此開過一、兩次會議，暫時未知幾時有結果，事關下一步要搵到中介機構做調查先。調查完結後，佢哋將約見冇超時補水行業嘅商會代表，研究具體情況後再協商解決辦法，希望以行業自律方式解決問題。
Stanley話，全港二百八十一萬打工仔之中，有六十幾萬人需要加班，當中三十二萬人冇獲補水，包括企業管理層、專業人士，佢哋希望撇除呢班人，再深入研究邊啲行業嘅員工未獲超時補水。佢話，冇理由因為少數業界冇補水，而連累工商界被迫接受全面立法。佢又話，工廠生產線都話可以衡工量值，但一般寫字樓員工如果遲到早退、飲下午茶、工作時間用手機上網，咁係咪仲要計算超時補水呢？
不過，靠業界良心發現、自動補足加班費畀員工，真係好唔可靠，況且唔係個個員工都想加班，以保持家庭生活質素。其實六、七年前社會就最低工資立法呼聲高，可惜時任嘅「貪曾」前特首曾蔭權爵士唔肯聽民意，喺競選連任前夕推出「工資保障運動」，呼籲保安、清潔等行業自發參與，結果參與者寥寥無幾，試驗兩年後宣布失敗，最後都係要透過立法解決問題。所以話呢，如果人人都識得自律，社會就唔會出現咁多問題啦！