經過四十三萬人七一遊行嘅寫實驗證，現屆梁朝政府同樣不得人心，雖然唔會有人懷念前特首曾蔭權爵士，畢竟貪曾惡名實在太昭彰，不過梁振英政府亦唔好得去邊，如無意外將會繼續寸步難行，推出任何政策措施都會阻力重重。無他嘅，一個未經過民意授權嘅特首，做咗一年都交唔出管治成績，先天原罪加上後天作孽，缺乏支持係十分正常嘅事。
功夫茶今日想講嘅係，當局宣布嘅「新界東北發展計劃」最新修訂方案，幾乎可以肯定係一個吃力不討好嘅不可能任務，隨時慘過希臘神話裏面，日日推巨石上山頂始終徒勞無功嘅薛西弗斯。發展新界東北嘅反對聲音勢必曠日持久，話唔定會再次出現反高鐵嘅激烈場面。當日反高鐵嘅其中一個訴求係保護菜園村，試問新界東北徵地重建將會摧毀幾多條菜園村呢？村民唔反對就假啦！
即係咁，若然現屆政府民望高企，真真正正做到「穩中求變」，甚至延後實現貪曾拍心口承諾嘅「福為民開」，備受爭議嘅發展新界東北或者有小小機會成功。不過可惜吖，事實唔係咁樣吖嘛，一個有四十三萬人上街聲討嘅政府，點會順利完成不可能的任務呢？發展新界東北淨係一句「官商勾結」嘅指控，已經有排你煩，煩到不知何年何月先至能夠起樓。
根據發展局局長陳茂波嘅講法，新發展區古洞北同粉嶺北住宅嘅地積比提高三點五至六倍，住宅單位超過六萬個，可容納十七萬五千人，其中六成係資助房屋。之前提過嘅坪輋同打鼓嶺，今次暫時擱置。波叔話喎，政府會以傳統新市鎮模式為基礎，解決香港嘅房屋問題。
咦咦咦，咪住先，發展新界東北唔係講過「深港融合」嘅咩？家陣變咗傳統新市鎮，究竟係怕咗「割地賣港」嘅指控而縮沙，定係再一次施展語言偽術重新包裝呀？
即係咁，功夫茶原則上唔反對覓地起樓安置蝸居一族，畢竟香港嘅房屋問題確係非常頭痛，不過大前提係唔好摧毀人哋嘅現有家園吖嘛。正如有受影響居民話齋，政府理據薄弱，無法說服佢哋搬村。村民更加警告，假如政府強行收地，不排除佔領粉嶺高爾夫球場。換轉角色諗一諗吖，如果因為要起樓而將禮賓府夷為平地，港產官僚肯唔肯先？
講來講去講到尾，起樓安民嘅大原則係無可厚非嘅，怕只怕徵地安排太粗疏，萬一賠償又不足，易地搬村又錯置，少不免又會係烽煙四起嘅連場抗爭。
嗱嗱嗱，發展新界東北千祈唔好再向地產商傾斜呀，否則下次唔知幾多人上街o架！