今年七一遊行係各泛民政黨嘅豐收日，唔少政黨沿途籌款都成功「吸金」大撈一筆，其中社民連（社記）成績都算幾好，只靠梁國雄（長毛）一人嘅魅力，無賣書無賣衫無賣紀念品，都籌到六十九萬。之但係長毛仲有兩單官司未找數，隨時要幾百萬埋單，所以六十九萬都只係九牛一毛。
雖然社記籌到接近七十萬，但社記財政狀況仲吊緊鹽水，長毛有兩單司法覆核都輸咗，分別係指梁振英參選特首時發虛假聲明，同舊年挑戰立法會主席曾鈺成剪布案。
法官最後判長毛要畀對方訟費，唯一慶幸係梁振英同曾鈺成現時都未向長毛發出「帳單」，但社民連副主席吳文遠話，每單案最少百幾萬，加埋阿牛單美孚屏風樓官司，夾埋最少四百萬，如果社記籌唔到錢，長毛一破產就無得做議員，咁社記同亡黨無咩分別。
所以吳文遠話，今個暑假要全力撲水畀長毛同阿牛。佢尋日又喺社交網站話，七一當日好多社記支持者同佢講唔好意思，因為嫌自己捐錢捐得少，其實市民舉吓手指公，佢都好開心喎。講嘢講得得體但唔夠老實，真係戥佢苦笑囉。