政情：梁陳智明談人生下半場
港鐵公司前事務總經理梁陳智明（Miranda）今年初退休後，生活愈見精彩，逢周六、日佢就同老公拍拖去騎馬耍樂，三個月前囝囝仲幫佢添咗一名可愛孫女添，加上愈嚟愈多嘅公職，Miranda嘅退休生活簡直忙過返工。上月佢仲應邀到電台開咪，廣邀名人好友分享點樣過人生嘅下半場，前高官蕭炯柱（蕭公子）亦現身做嘉賓，大談佢以音樂向天水圍孩童送暖嘅感受。
傷聲帶阻唱粵曲
Miranda話，佢同蕭公子相識多年，今次蕭公子應承喺咪前開講，機會十分難得，事關蕭公子退休後一直謝絕傳媒訪問。呢個訪問早前已預先錄製，Miranda盛讚蕭公子依然風度翩翩。受訪嘅名人嘉賓仲有今個月底退休嘅中華廠商聯合會行政總裁梁世華等人。
Miranda話，佢好鍾意唱粵曲，不過幾年前地鐵同東鐵合併成為港鐵一役，佢因為要經常同傳媒交代進展，講得太多，結果傷咗聲帶，醫生話若想唱番粵曲，除非唔講嘢。Miranda笑笑口話，佢咁鍾意講嘢，點可能呢？