政情：陳國民為旗下產品呼冤
菠蘿包冇菠蘿，老婆餅冇老婆，相信市民唔會投訴貨不對辦。早前消委會測試市面攪拌機及榨汁機，指包括德國寶「自然養生機」在內嘅貴價機，以欠科學證據嘅營養聲稱作賣點，可能觸犯《商品說明條例》，事件引起德國寶老細陳國民極度不滿。佢話，市面上仲有「西施煲」，唔通市民食咗西施煲煮嘅飯就會變西施？按消委會嘅邏輯，豈不是大把商品違例？
稱測試結果與實情相反
陳國民話，自然養生係世界潮流，旗下養生機特別因此而設計，用家只需按一個掣就可以省卻自行轉換摩打速度嘅繁複程序，輕鬆攪碎蔬果皮同埋核，自製養生菜單，絕非攪拌或榨汁機咁簡單，故取名養生機，唔係話市民買咗部機返去就可以長命百歲。
佢又批評消委會犯專業錯誤，將反映摩打攪拌食物性能嘅「標示功率」與測試得出嘅「量得功率」差距當係準確度偏差，偏差愈大評分愈低，實情啱啱相反，偏差愈大可以磨碎食物嘅空間仲高，查實係優點。結果佢部養生機偏差達四成五，成為最大嘅受害者，難怪佢諗起就火滾。佢已委託律師發信畀消委會，指其涉嫌誹謗，惟消委會否認，佢唔排除採取進一步行動喎。