政情：民記拍戲也「低頭」
時下流行拍攝「微電影」，民建聯近日亦有樣學樣推出首套微電影《低頭》，話就話叫微電影，但就拍到好似啲新聞檔案節目咁，加上微電影係針對一眾經常低頭用手機或長時間上網嘅年輕網民，結果條片只係出街兩日，即有數以千計負評，而且被網民留言鬧爆。有網民揶揄該黨經常就政治民生議題轉軚，批評該黨已經常向政府低頭，不如開拍「出賣」、「跪低」等微電影喎！
倡拍《出賣》同《跪低》
其實呢套講述年輕人上網成癮嘅微電影，故事主角因沉迷上網搞到同屋企人關係欠佳，無心機返工不特止，連靚女同事請食糖都唔吼，最後仲一時意氣離家出走。直至佢玩到電話無電時，喺褲袋模到一粒糖後忽然恍然大悟，十足該黨攞到粒糖後「低頭」一樣，認真諷刺。片中就穿插社工、精神科醫生同該黨議員蔣麗芸（Ann），用專業角度講吓道理，咁阿Ann係屬於咩專業呢？
雖然呢套微電影劇情張力麻麻，但前日上架後，就喺網絡世界激起千重浪，旋即引起各界關注。有網民話，呢套微電影命名相當符合該黨黨性，建議佢哋不如開拍「出賣」、「低頭」、「跪低」三部曲，前傳「出賣」內容可以係該黨過往「打倒昨日的我」嘅優良傳統，仲可以跨黨派搵埋白鴿黨硬骨頭來客串擔綱演出喎。不過，有網民就話，該黨開拓網絡市場事有蹺蹊，質疑係咪想抹黑醜化網民，最終達成維穩大業。
訪問年輕人 自打嘴巴
該黨仲搞項調查，發現逾六成年輕人每日平均用超過兩小時上網，仲有近四分一受訪者經常一邊食飯一邊「篤機」。不過，睇番調查結果，因為上網影響健康同社交嘅年輕人少之有少，逾半受訪者都表示未因上網影響健康，亦無影響同家人關係，另外因為上網而唔應約嘅受訪者只有百分之八，相反就有八成人定力強勁，話未試過因打機缺席聚會。該黨咁樣「先天下之憂而憂」，唔怪得被咁多年輕網民鬧爆喇。