中環出更：政總開餐 CY無食米粉
身兼經濟發展委員會（經發會）主席嘅特首梁振英（CY）尋日開會後見記者，臨走前有記者問佢可唔可以「開誠布公」交代下名下公司資產成立信託進度。不過CY無答就轉身離去，同身邊嘅人「開誠布公」交代一陣去邊度食飯。
經發會三月首次會議後曾拉大隊去政總餐廳開餐，而CY尋日一個轉身唔係要答問題，而係想問財政司司長曾俊華（鬍鬚曾）係咪「又」去政總食飯，好可惜尋日鬍鬚曾咁啱帶咗住家飯，陪唔到佢，而好多委員開會後都急急腳走人，結果CY同經發會成員蘇澤光同劉炳章三個人喺政總開餐。
唔怕毒米粉 因食牛腩河
雖然今次食飯人少少，但無損CY雅興，撞到卓妮同朋友後仲叫我哋要等埋食物上枱先好同佢影相喎！我哋見到CY食牛腩粉，於是就講笑問佢怕唔怕毒米粉，不過CY就一於食粉無有怕，梗係啦，因為佢嗰碗係河粉，唔係米粉。講到呢度，CY身邊G4隨從亦相繼埋位護主，但CY就意猶未盡咁喺G4身後鑽出頭來，笑騎騎咁講咗一句：「你有無入廚房o架？」