中環出更：秘宴官商 林健鋒中頭獎？
中環九如坊一帶出名多美食，卓妮尋晚諗住去嗰度食清湯牛腩，竟然見到班好熟面口嘅人前後腳進入一間高級中菜館，睇真啲原來係財政司司長曾俊華（鬍鬚曾），同行仲有一大班政商界人士，包括有金融服務界立法會議員張華峰、行政會議成員林健鋒、旅發局主席林建岳（肥仔岳）、東亞銀行主席李國寶、財經事務及庫務局前局長馬時亨（肥亨）、滙豐銀行亞太區行政總裁王冬勝，組成官商界神秘飯局，認真耐人尋味，莫非共商大計？
卓妮尋晚食完牛腩河做晚餐，正當碗粉都未落格，就喺蘭桂坊酒店門口發現張華峰伉儷，原來佢哋去酒店入面間「名人坊」食飯。我哋開頭以為係兩人撐枱腳，點知陸續有人到達，包括鬍鬚曾夫婦，之後就到林健鋒（Jeffrey）夫婦、肥仔岳、李國寶夫婦、肥亨夫婦、王冬勝夫婦前後腳進入酒家。其實喺眾人到場之前，門外已見到有人運送一箱二箱紅酒及酒杯到場。咁隆重，究竟所為何事呢？
呢班人個個活躍於商界，尋晚突然搞飯局一聚，似乎唔係咁簡單，加上財爺鬍鬚曾現身，更加耐人尋味。據講呢餐飯係Jeffrey請客，有傳佢早前中咗六合彩頭獎，所以先請班老友記食飯。
賓客唐營味重
不過，飲到臉紅紅嘅Jeffrey離開酒家時，卓妮就追問佢究竟係中咗幾多錢彩金，佢話：「無咩話中唔中，普通食餐飯之嘛！」不過，如果睇真啲會發現，飯局上個個都「唐營」味甚重，難道Jeffrey唔怕被人話佢「身在梁營、心在唐營」？
卓妮