網絡無王管抹黑播謠言

○三年沙士爆發，香港被謠傳成為疫埠，引起市民恐慌；○八年本港一間銀行，被誤傳財政出現問題，結果引致擠提……本港過往曾多次出現這類網絡謠言，造成社會混亂，犯罪學家黎定基指出，一般人難以分辨網上留言真偽，真相亦容易被掩蓋，他說：「網絡好似一把雙刃刀，如果使用者立心不良，網絡就會淪為佢哋嘅武器。」

或為自身利益 惡意中傷批鬥

黎續指，除私隱被侵犯、銀行擠提、傳染病散播外，過去亦不時傳出明星或政要罹患絕症，甚至身亡的消息，「有啲人為咗自身利益，可能會抹黑商業對手，或者發布對本港經濟不利嘅消息，令股市大跌，引發金融風暴，如果去到國家層面，誤傳某國與某國開戰，甚至會影響國與國之間嘅關係。」

誹謗零容忍 金小姐（模特兒）：「自己都有睇開討論區，如果有失實誹謗嘅言論，網站管理人都應該立即刪除佢。管理人手如果太少就應該加番，網站唔可以冇人管理。」

梁小姐（中學生）：「如果網上有誹謗文章一分鐘都唔可以忍，對受害人自尊心有好大打擊，會令當事人情緒唔穩定。」

香港家長協進會主席陳星達表示，隨着科技進步，不少兒童已習慣經常上網，令他們於網上被欺凌的機會大增，他說：「上網講嘅嘢，一出聲就收唔番，如果講錯少少嘢，隨時惹嚟其他人攻擊。」他指，不時從其他家長口中，聽到有人被欺凌的個案，「其實好多家長都擔心子女成為受害者，但又無能為力，好多時都係發生咗先知。」

市民齊斥責 李先生（財務顧問）：「我有個啱啱升中學嘅仔仔，都驚佢牽涉喺網絡欺凌事件，惟有同佢多啲溝通，如果佢真係貼咗誹謗貼文，好嚴重嘅話都會幫佢搵網站負責人刪除有關貼文。」

文小姐（中學生）：「依家網絡威力大，討論區有誹謗貼文對人傷害好深，唔可以睇到有呢啲貼文都唔刪，我覺得一個鐘就要刪先叫合理。」

陳續指，過去曾與學校及教育局溝通，但對方均表示無法制止，「惟有教小朋友唔好擺太多個人資料上網，以免被人起底，甚至影響到佢哋自身安全。」香港家長聯會會長李偲嫣亦表示，曾聽過有學生因被網上欺凌，並連續數天扮病不上學，着家長切勿忽視欺凌對學生的傷害性。

伺服器擁有者 接投訴始處理

城市大學電子工程系副教授鄭利明表示，以現今技術層面，伺服器擁有者能阻隔未經證實謠言流出，但由於現時未有足夠法律監管，擁有者一般不會主動阻隔，他說：「因為唔使負刑責，通常要等有人投訴，擁有者先會處理相關言論。」

「網上有好多古靈精怪嘅謠言無人理，成日都要等到傳媒報道踢爆，執法部門先做嘢，冇報道都未必做！」立法會議員黃國健表示，網上謠言傳播速度快，且殺傷力大，對社會或受影響機構，會造成巨大影響，因此政府必須作出適度監控，如制訂執法標準，以阻止謠言散播。