官僚欺善怕惡 屯門垃圾圍城

本來有三個人工作,忽然之間少咗一個,變咗兩個人承擔責任,你估會有乜嘢後果吖嗱?後果好明顯啦,一係兩個人做到裙拉褲甩,一係兩個人呻到樹葉都落。喂,本來係三分一工作量,失驚無神變咗五成喎,出現負能量係人之常情啫。

即係咁,環境局打算擴建三個堆填區,分別係將軍澳、屯門以及打鼓嶺,將軍澳居民群起反對,向政府大大聲說不。官老爺隨即打退堂鼓,撤回將軍澳方案,淨係向立法會提交屯門以及打鼓嶺方案。哈,竟然又畀佢闖關成功喎,立法會工務小組委員會通過打鼓嶺堆填區七十億元擴建費,屯門堆填區擴建嘅前期研究三千萬元撥款亦以兩票之差開綠燈。

你知啦,屯門同樣係一個人煙稠密嘅社區,冇可能歡迎你將垃圾倒落自己屋企後花園喎。所以屯門街坊氣憤難平,認為政府大石砸死蟹,同時又後悔自己唔夠惡,反對聲音相對較細,家陣有可能承擔埋原本運去將軍澳嘅垃圾。

對於呢次三減一等於二嘅擴建大計,有人形容為「會哭的孩子有糖吃」。計功夫茶話齋,之所以會出現咁嘅情況,歸根究柢係環境局官僚欺善怕惡,若然屯門居民又惡又會哭,話唔定係三減二等於一,由打鼓嶺獨力承擔所有鋪天蓋地嘅垃圾。

講真吖,屯門居民可能真係太敦厚嘞,搞到特區政府一次又一次將厭惡性設施集中於區內。屯門除咗有堆填區,亦有發電廠,仲有環保回收園同飛機燃油廠,連興建垃圾焚化爐都係選址之一。

屯門居民有苦自己知,最近有人更加指出,大量廣翅蠟蟬入侵家園。廣翅蠟蟬係乜乜東東呢?呢一種昆蟲未變成蟲之前嘅若蟲係白色嘅,好似一堆棉絮咁,吸食植物汁液,導致植物枯死,所以漁護署將廣翅蠟蟬列為害蟲。廣翅蠟蟬入侵家園,即係屯門居民苦上加苦囉!

講番擴建堆填區吖,垃圾處理係咪應該一味堆填呢?當然唔係啦,既可以源頭減廢,亦可以垃圾分類,更加可以回收再造。可惜特區官僚一向短視,要到將軍澳居民絕食抗議之後,環境局局長黃錦星尋求支持擴建另外兩個堆填區先至承諾,政府將於短期內成立可持續發展督導委員會,研究如何支持回收業長遠發展,例如提供經常性補助等等。黃局長又話,考慮以現時嘅環境及自然保育基金,資助推動回收業嘅發展計劃,長遠更可能成立回收基金。

問題係,會唔會過咗海就係神仙呀?不如咁啦,假如官老爺空口講白話,垃圾圍城嘅屯門居民唔可以敦厚㗎喇,一於同佢哋唱番一首歌:家姑娶新抱,惡人自有惡人磨!