政情2.0：廢腑之言：阿Ann：識執狗糞 才有普選
由爭取八八直選開始，香港人話爭取民主都講咗廿幾年，但好多建制派人士話香港市民未成熟，如果實行民主化未必係好事，到底香港人點先算係成熟呢？向來金句百出嘅民建聯蔣麗芸（阿Ann）尋日又有新定義。
佢話香港要普選，人民必須要建基於道德之上，但點先係有道德呢？阿Ann就列舉三大例子，第一係如果學生朝早識向老師、父母親講早晨，第二係坐地鐵時要識讓座，第三就犀利喇，佢話如果有人拖狗落街，都識主動執狗糞，咁香港人真係夠晒成熟喇，可以有普選。唔通爭取普選，要由人人普及地養狗同執狗糞開始？