政情2.0：今日你上鏡：「蘭」逃追問

英國駐港總領事吳若蘭（Caroline Wilson）上個月畀家鄉嘅傳媒揭發，以月租七十二萬元入住司徒拔道超級豪宅Opus後，一直潛水唔見影。佢尋日終於蒲頭，出席香港總商會嘅午餐會，硬銷英國商貿優勢，仲同台上台下嘅老外朋友有傾有講，有問必答，盡顯外交家功架。不過話口未完，吳若蘭喺午餐會結束後即飛步走去撳升降機想話拿拿聲鬆人，對香港傳媒有關斯諾登或入住豪宅等提問一律借咗「聾耳陳」隻耳當聽唔到。可惜架升降機等極都未到，畀我哋逼到埋牆角嘅吳若蘭喺呢個時候終於回應咗一句「唔係適當時候接受訪問」，就喺眾人護送下入升降機。