十年前沙士後經濟跌至谷底，七月一日有五十萬市民上街。之後每年七一，上街嘅人仍然好多，有人話七一遊行係風土病，有人話係節目，遊行人數反映市民畀政府嘅分數，不過對上街嘅人數，都有好大爭議，好大「彈性」。廠商會代表林大輝就認為，七一唔應該放假。
立法會尋日辯論政府應該正視七一遊行訴求，大輝話今次七一咁多人上街，梁振英作為特首，唔應該再花言巧語，而應該用政績話畀香港人聽，佢係有能力挽回民心。
點知佢講講下，佢就話香港雖然係言論自由城市，但七一成為市民控訴大會，呢個現象好可悲。
咁大輝有咩解決良方呢？佢竟然話最好取消七一公眾假期，打工仔繼續喺七一返工，做學生就繼續返學，講到好似無七一香港就無怨氣一樣，估唔到平時字字珠璣嘅大輝都有亂講嘢嘅時候。
好彩立法會資訊科技界議員莫乃光即時回敬大輝，佢話就算取消七一公眾假期，市民都會揀十月一日上街，如果連十一都要返工，咪元旦日遊行囉，點阻止到香港人呢？今次畀莫乃光威番次，大輝實在太理虧。