政情：篩選區會撥款方案 陳振彬捨人為己？
觀塘區建制派為一億元地區重點項目爆發內訌。觀塘區議會地區重點項目工作小組尋日開會，原本有六個建議方案予小組討論，不過會上觀塘區議會主席陳振彬（Bunny）因各種原因篩走一個又一個方案，最後剩番佢自己提出嘅方案，有觀塘區議員批評Bunny嘅做法「霸道、不民主」，直情係為坐落於自己選區嘅方案「度身訂造」出線。
陳否認 盼以和為貴
有區議員會後爆料，身為小組主席嘅Bunny尋日會上連番出招，疑似為自己同鄰區區議員馬軼超一同提出嘅觀塘瑞寧街樓梯通道興建升降機塔工程「護航」，其中一個疑似被篩走嘅方案，係民建聯潘進源提出嘅3D音樂噴泉。潘進源認為，應畀機會議員喺區會大會投票決定支持邊個方案，唔應該由大會主席決定係咪可行。另有與會者亦質疑，Bunny提出嘅升降機方案唔見得有乜特別亮點喎。
Bunny接受查詢時否認曾篩選任何方案，重申希望大家可以和為貴解決問題，最終仍須於下周二區會大會作最後決定，但他同時希望挑選出嘅亮點工程方案，最重要能得到政府部門支持。