政情：吳克儉撐得真肉酸 中史排第八受歡迎？

議員斥當局唔面對現實

有議員尋日喺立法會提出質詢，話近年唔少中學都取消以獨立科目教中史，以致修讀中史科嘅高中學生人數近年持續下降。今年報考人數更只有七千幾人，比舊年銳減超過一千人。而根據政府數字，近年報考中史科嘅人數只係佔考生人數約一成一至一成三。

不過吳克儉似乎視若無睹，佢仲話除咗必修科外，不論係以前嘅高級程度會考定依家嘅中學文憑試，中史科都喺最受歡迎科目中排行第八位，仍然好受歡迎。議員黃國健聽到佢咁講都忍唔住扯火，話唔明點解明明只有一成幾嘅學生修讀中史，當局都唔面對現實，仲大鬧「教育局呢班庸官根本係數典忘祖」，吳克儉淨係識誇誇其談咁話。