中環出更：鄭錦鐘夫婦大手掃童畫
兒童縱有藝術天賦，都要靠後天培育。保良局尋日舉行兒童藝術展，主席鄭錦鐘（Eric）同太太鄭關巧妍（Katie）對住六百幾幅畫同陶藝作品，睇到眼花繚亂，最後忍唔住認購咗好多，將善款撥捐幼兒藝術發展。Eric笑言，要將啲畫同陶藝掛喺主席辦公室，等賓客來訪時睇到，順便宣傳該局嘅服務，認真有計！
Eric兩夫婦好有默契，最愛場內一幅名為《我愛爺爺》嘅作品，更爽快買下。已有三個孫仔嘅Eric話，覺得畫中嘅爺爺同三個孫，好似反映緊佢自己喎！Katie更發現，創作呢幅畫嘅學童原來就讀以佢命名嘅幼稚園，咁就更有意義嘞。Eric又睇中咗幅以馬為主題嘅陶藝，笑言身為馬主，梗係想「馬到功成」啦！
郭羅桂珍行勻兒童藝術展
副主席郭羅桂珍都喺度，佢對批畫作都好感興趣，行勻成個會場，見到鍾意就買，更即時舉起手機影相。郭太話，雖然自己唔識畫畫，但好欣賞小朋友嘅藝術天分，買咗會送畀老友，部分就放喺公司嘅茶水間，提醒員工要多做善事。講到十三個月大嘅孫仔Jacob，佢更加笑不攏嘴，大爆乖孫前日啱啱識得行，依家最鍾意玩貼紙。
卓妮仲見到總理陳黎惠蓮，佢話買咗九幅畫，會放喺幼稚園畀小朋友欣賞。已有四個乖孫嘅陳太，開心咁公布喜訊，原來佢將喺下月及十月抱多兩男孫，真係兒孫滿堂，恭喜晒！
卓妮