九巴爛車門 黐膠紙離譜
「咁大間公司，車門爛咗就咁用膠紙修修補補就算，如果黐唔實冧落嚟揼親人咁點？」鄭先生日前於西貢乘搭九巴99號線前往烏溪沙，發現車門左方膠板及車廂內的燈罩均告損壞，但破爛位置僅貼上透明膠紙，擔心會隨時跌下威脅乘客安全，不滿九巴維修「是是但但」。
九巴發言人表示，一直非常着重車隊維修及保養，接獲本報轉介後已即時維修。發言人又說，倘乘客對車廂設施有任何意見，可致電九巴顧客服務熱線提供相關資料。
「就算乘客唔投訴，九巴明知啲嘢爛咗，都冇理由就咁用膠紙封住就算掛？」鄭先生指出，九巴近日加價已令升斗市民百上加斤，服務質素竟不進反退，要求九巴就事件作出檢討。