屢戰屢敗，屢敗屢戰，環境局計劃擴建堆填區雖然輸過一仗，而且係輸得一塌糊塗嗰隻，不過局長黃錦星都算死纏爛打咯，將擴建計劃再一次攞去立法會闖關。哈，居然又畀佢敗部復活喎，擴建堆填區撥款獲得通過。
如果大家唔係好明功夫茶講緊乜，不如講得詳細少少啦。環境局打算擴建三個堆填區，分別係將軍澳、屯門以及打鼓嶺。你知啦，將軍澳已經係人煙稠密嘅新市鎮，當地居民自自然然齊聲反對，冇理由任得垃圾臭氣襲人啫。立法會尊貴議員唔敢得罪選民，所以事先聲明反對到底，嚇到黃錦星撤回方案，即係未打先輸鳴金收兵。
唔服輸嘅黃局長一個屈尾十剔除將軍澳，三減一等於二，將擴建打鼓嶺以及屯門堆填區嘅建議送上立法會工務小組討論。左討討右論論之後，建制派保皇黨發功，擴建屯門堆填區嘅前期研究撥款三千萬元最後以兩票之差通過，打鼓嶺堆填區就以十八票對十票得到開綠燈嘅待遇，撥款七十億元。
為咗安撫反對擴建嘅廣大市民，黃錦星話喎，政務司司長林鄭月娥將會成立可持續發展督導委員會推動源頭減廢，研究以整體社會效益為前提之下，向回收業提供經常性補助，考慮以環境及自然保育基金資助回收業發展。
兩個撥款建議係就係過咗骨，不過仍然要得到立法會財委會支持先至算數。萬一財委會上演一幕「向政府說不」呢？咁就前功盡廢ｏ架喇，相關方案變成垃圾。
其實講真吖，咁多人反對擴建堆填區嘅原因之一，就係官老爺獨沽一味堆填堆填再堆填，既未做好源頭減廢，亦未做好循環再造。喂，家陣成立可持續發展委員會推動源頭減廢，會唔會係臨急臨忙急就章嘅權宜之計呀？難怪有議員質疑，利用成立委員會過關，最終討論多於實行。
講到資助回收業發展咯喎，做得到固然好，問題係成事機會有幾大先？資助回收業發展無財不行，更加不行嘅係無地。若然回收業租金太貴，可用空間又有限，爛銅爛鐵爛塑膠嘅收買佬無法經營，環保事業勢必受到重大挫折。
簡單咁講，回收業必須有利可圖先至能夠蓬勃發展，如果政府嘅所謂補助以及資助到喉唔到肺，甚至乎好心做壞事，搞到業界雞毛鴨血，咁成件事就會變得非常搵笨。好似塑膠物料回收咁吖，政府係就係有津貼，不過由於大部分塑膠物料係送去內地循環再造，而內地近日收緊法例，禁止未經清洗以及壓成膠粒嘅廢料入境，本地回收商苦無出路，惟有靜雞雞將塑膠物料送去堆填區，做法荒謬到極。亦即係話，廢物回收最怕監管爛尾，環保冇可能成功ｏ架！