貪曾下台成年，圍繞他的貪腐新聞依然如煙花般燦爛，相信貪曾若然無聊午睡，自然不會有「鐵馬冰河入夢來」；既是無官一身輕，人走茶涼，小肚雞腸修不成君子嘅曾爵士，恐怕亦不會有「閒花落地聽無聲」嘅逸致！
之不過，「貪遍省港澳，歎盡海陸空」嘅貪曾，廉署查足成年有多，依然毫無進展，佢雖然逍遙法外，可醜聞從未停止過。港府日前公布貪曾任內最後兩個財政年度，買酒數量特多、特貴，當中更包括烈酒，耗用開支相等於三司十二局同期買酒量的總和，「一個頂十五個」。
老朽「頂」一聲，心諗：唔通貪曾下台後想學「竹林七賢」嘅劉伶，飲到大醉失態，在大道上裸奔，還自稱以天為衣被，以地為床笫？之不過劉伶酒量好，詩文更好，「除卻文章無嗜好」。而貪曾呢個「香港仔」禍港七年，除卻煲呔那個「」字印記，吹水治港至叻，貪到最後一刻最無敵，貪曾治下嘅特首辦，竟未有保存好其最後兩年嘅存酒數量，令人懷疑有人故意銷毀或不保存有關紀錄，難道銷毀就等於冇買？
身為行政長官，衣食足卻不知榮辱，而且小貪到嘴臉咁難睇，都算罕有。元代文人曾作《正宮‧醉太平》，正是貪到一雞一菜都不肯放過嘅貪曾寫照：「奪泥燕口，削鐵針頭，刮金佛面細搜求，無中覓有。鵪鶉嗉裏尋豌豆，鷺鷥腿上劈精肉，蚊子腹內刳脂油，虧老先生下手。」
這首「譏貪小利者」令人拍案叫絕。「人不知止，其禍必生」，之不過，世事又真係無絕對，有隧道職員因「貪」一蚊而痛失飯碗兼多年退休金，貪曾所貪者不知是一蚊嘅Ｎ倍，可廉署調查了年多仍「密密實實」，所謂「法律面前人人平等」，搵鬼信喇！倒是「竊鈎者誅，竊國者侯」在現實生活中經常上演，蟻民只好認命，暗自羨嘆人家祖墳風水好！