小明李家仁醫生最近用一首《慳水進行曲》教人唔好嘥水後，唔知係咪慳慳埋埋水頭充足，佢診所尋日下午一點鐘突然爆咗天花消防喉，診症室好似變咗黃果樹瀑布咁，枱面同地面濕晒，即時將全個診所嘅水桶、膠垃圾桶用嚟接載漏水。
小明話，好彩當時睇完上晝啲病人，又冇放病歷喺枱面，電腦又冇滴濕，否則真係唔知點算，不過佢已即時清理好晒，今日如常診症，稍後仲會搵啲消防工程人員換咗啲有問題消防喉添。雖然今次爆喉搞到小明好狼狽，但佢話嚟緊十三號會如常出席水務署一個活動，繼續教人正確用水喎！
