七一遊行唔少政團都趁機會擺街站籌款，皆因七一係最大嘅籌款時機。多個籌款街站以社民連嘅成績遙遙領先，佢哋聲稱落雨落到貨品賣唔去，但係主要靠市民捐款，都籌得六十九萬元，比起舊年嘅四十萬元有大幅嘅增長。之但係，人民力量嘅遭遇就好唔同。
吸金力強嘅立法會議員黃毓民同人民力量分裂，令人力今年嘅籌款額大為縮水，由舊年七十萬元跌至今年約三十萬元，跌咗一半有多。
人力前主席劉嘉鴻話，雖然人力內部風波對籌款成績有啲影響，但都唔及落雨影響大。不過睇其他政黨嘅情況，佢嘅推斷又未必係全對囉。
新民主同盟今年大豐收，新同盟范國威（Gary）話今年佢哋籌得十一萬元，同舊年六萬元比簡直可以攞飛躍進步獎。Gary話今次勝在產品夠多，雖然落雨搞到佢哋嘅佔中遊戲卡濕晒，損失咗一百套，但佔中遮大賣，幾乎被搶購一空。新同盟今次可以話真係食正條「水」。
將今年各大黨嘅籌款額加起嚟，總數明顯多過往年。其中民協就只籌到四萬元，但原來已經係歷史新高。市民眼睛雪亮，籌款成績一定程度上可反映政黨嘅人氣。