政情：鼠王芬突笑口噬噬
立法會議員梁美芬（鼠王芬）向來有副戰鬥格，隨時向泛民主派議員發動攻擊，但有泛民主派人士發現佢過去兩日和善咗，而且笑口噬噬。大家咪誤會，鼠王芬唔係執到金，實情係佢執到「銀」，獲頒銀紫荊星章，所以搞到心花怒放。
「不尋常地愉快」
社民連副主席吳文遠爆料話，尋日同鼠王芬出席電台節目講政改時，原本預計討論會火花四濺，但赫然發現對方心情「不尋常地愉快」，事關平時駁嘴駁舌、對泛民起晒弶嘅鼠王芬，句句客氣又冇插嘴，打造咗個唔似鼠王芬嘅鼠王芬喎，驚訝「銀紫荊」果然犀利。莫非第時要改口叫鼠王芬做「銀鼠芬」？
不過，鼠王芬獲授勳並非無風無浪，因為有政界中人對佢做咗立法會議員不足五年，就獲頒銀紫荊星章有啲意見。
有人仲特別搵咗九十年代開始做區議員、曾三度當選立法會議員嘅王國興（阿王）做例子，認為佢服務社會二十幾年，竟然僅獲得銅紫荊星章，認真係同人唔同命。阿王接受查詢時話「絕對無唔開心」，強調會以平常心對待嘉許喎。