政情：吸女有計 盼逼爆蘭桂坊
蘭桂坊之父盛智文鍾意動腦筋，今年嘅蘭桂坊音樂啤酒節，佢特別諗計吸引女士入場。佢話啤酒唔係男人專利，今年會將全條和安里化身特色啤酒街，專為女士引入輕盈新穎嘅啤酒口味，例如水果、朱古力及蜜糖啤酒。呢啲啤酒聽來古怪，好唔好飲真係要試過至知。而啤酒嘅基本客始終係男人，今年會有肚皮舞女郎載歌載舞，亦會推出啤酒節十周年T恤同玲瓏浮凸嘅比堅尼女郎啤酒杯。
盛智文明明唔飲酒，不過尋日佢攞住個靚杯扮飲。盛智文預期今年吸引十八萬人次入場，比舊年多兩成，希望本月十三、十四日「逼爆蘭桂坊」。
促港府盡快政改諮詢
喺政治圈中一樣人氣了得嘅盛智文，原來七一朝早去完升旗禮酒會，晏晝就去睇七一遊行，佢話見咁多市民風雨不改照上街，明顯怨氣好大。佢建議行政長官由政黨產生，等佢唔使孤立無援。佢覺得政府應快啲就普選展開諮詢，但就唔贊成佔中，以免影響國際形象。所有至熱門話題，盛智文都有佢嘅諗法。
身兼海洋公園主席嘅盛智文為今年九月海洋公園加價辯護，話因為開支升左三成幾，而樂園始終係盤生意，又話迪士尼都加價啦。