政情：貪曾匿加國好似搵庇護
美國中情局「走佬特工」斯諾登早前爆料揭發美國監控風波，現正尋求多個國家庇護，事件未平息，香港又發生有大貪官不尋常離港事件。講緊係捲入貪腐醜聞嘅「貪曾」前特首曾蔭權爵士，事關佢連港府每年一度喺回歸七一升旗禮同酒會都突然失蹤無出席，事後惹來各方非議。有政界中人隨後更踢爆貪曾其實係去咗加拿大探望細佬，貪曾此行鬼鬼祟祟，唔知仲會以為佢因為個人貪腐要尋求加國庇護。
本報去年二月連日獨家踢爆貪曾任期尾「貪盡海陸空，歎盡省港澳」，多個政黨先後到廉政公署舉報貪曾嘅貪腐醜聞，但至今事隔近一年半，廉署仍然未有交代貪曾案嘅最新進展，有冇跟進過都冇人知，總之調查速度慢過隻龜。雖然廉署放軟手腳，貪曾就自己知自己醜，除咗唔敢返前特首辦公室歎茅台外，據聞仲驚到連回歸七一升旗禮同酒會都唔敢去，一聲外遊就玩失蹤，認真丟架。
近期去酒會冇人打招呼
究竟貪曾有乜重要事情緊張到連七一升旗禮唔出席呢？我哋四圍向政界人士打聽，收到風貪曾喺七一前同人講，六月底會去加拿大探細佬，有人估計貪曾製造不在場證據係事出有因，因為佢最近先後去過兩次酒會，包括係某左派報章同內地省市招商活動，有在場人士爆料話貪曾期間好無癮，又無乜人同佢打招呼，有啲人見到佢就避得就避，貪曾十足過街老鼠，可能為免尷尬都係避席好過喇。
突離港遭諷避「落鑊」
不過，貪曾尋日突然有個遲來嘅交代，就係搵咗前任特首高級私人助理回覆傳媒話，貪曾六月下旬離開香港，現時仍身在外地，離港前已通知民政事務總署並感謝邀請，又對未能出席升旗禮及酒會表示抱歉喎。所以話呢，早啲解釋咪好囉，搞到神神秘秘、鬼鬼祟祟為乜呢？難怪有政界中人講笑話，唔通貪曾突然離港係為免日後因為個人貪腐醜聞而「落鑊」，所以搵定加國庇護？