中環出更：鍾海燕「創」健康人生
「光學儀器大王」黃克競創辦嘅寶源基業曾經名揚四海，但黃克競去世後，寶源股權已賣畀中華廠商聯合會常董戴澤良，黃氏族人亦轉趨低調。早前有日晚上，卓妮喺灣仔一間食肆見到戴澤良太太兼仁愛堂副主席羅台秦（Louisa），同黃克競太太鍾海燕（Heidi）一齊食飯，原來呢兩位寶源前後任老闆娘，因收購寶源一役而結緣，咁啱佢哋都係台灣人，從此一見如故。
與羅台秦擬貢獻婦界
Heidi望落比實際年齡後生好多，皆因佢最近醉心做保健產品生意。Heidi話，佢廿三歲未正式打工就嫁嚟香港，過咗廿幾年養尊處優嘅少奶奶生活。後來丈夫過身，Heidi經歷咗一段人生低潮，直至認識旅美抗衰老專家余啟宸，先至知道情緒與健康息息相關。
近年Heidi同余啟宸合作，將余醫生研發嘅保健及化妝品喺美國銷售，備受好評，近期準備進軍中港、巴西及東南亞添！Louisa話，佢睇住Heidi走出一條健康人生路，都戥老友開心，仲話要同Heidi度吓橋，為面臨家庭及情緒問題嘅城中婦女做點事。