中環出更：西裝褸補鈕 錢果豐節儉
港鐵上月底又加價，唔少基層市民叫苦連天，又要再慳啲使嘞。不過，其實港鐵主席錢果豐（Raymond）都好慳家，事關卓妮早幾日見佢一支公現身中環ifc，當時佢身穿休閒服，反起Polo衫衫領，一手挽住件咖啡色嘅西裝褸，好瀟灑咁搭電梯上二樓，再步進一間意大利品牌服裝店，原來係為咗配番粒西裝鈕。
當日Raymond一支箭咁走入服裝店，班店員立即熱情地招呼佢，唔使講都知佢係熟客。不過，Raymond並唔係買衫，反而將手上件西裝褸遞上，再同店員討論咗一陣，然後將件褸放低就轉身離開，跟住急不及待咁喺褲袋度拎部手機出嚟，耷低頭猛咁o架。
卓妮上前同Raymond打招呼，佢話件西裝褸早前着着吓甩咗粒鈕搵唔番，出面好難配得到一模一樣嘅鈕，所以專程攞番去舖頭補鈕。
稱最近好忙 冇時間外遊
卓妮問佢近況點，佢話最近好忙，搞到想去外遊都冇時間喎。時間就係金錢，相信好多大孖沙寧願買過件新褸，但Raymond咁忙都花時間四出搵粒鈕，莫非件褸對佢嚟講好有特別意義嘅？
卓妮