香港民不聊生、民怨四起，但財政司司長曾俊華日前被問到會唔會跳船時，佢都答得好堅定話唔會，仲話愈做愈興奮。不過我哋聽聞，一年前嘅佢唔係咁諗，江湖傳聞話去年鬍鬚曾原本無機會做財爺，鬍鬚曾亦自己知自己事，嗱嗱聲喺香港搵地方住，以免第日無官邸住時都唔知點算。不過幸運女神再次眷顧鬍鬚曾，有高人指明要鬍鬚曾留低做財爺。咁啱鬍鬚曾現時申報有一層灣仔物業收租，唔知呢間係咪佢上年買定嘅「安全屋」？佢話興奮，就梗係啦，做守財奴看住個金庫飲咖啡，畀邊個都一樣咁興奮！
