政情：陳智思好懷念囍帖街
政府日前擬將俗稱「囍帖街」嘅灣仔利東街重新命名為「囍歡里」，結果惹來市民爭議。身為前古物諮詢委員會主席嘅行政會議成員陳智思（Bernard）都話好懷念舊時嘅囍帖街，佢憶述自己當年由外國留學回港工作，經常都幫襯街尾嘅一間雲吞麵檔，但自從利東街被政府收回業權後，已經搵唔番間麵檔喇。
Bernard話，當年經常去呢間雲吞麵檔食麵，並非因為啲麵好食，而係因為粒雲吞「抵食夾大件」喎。不過，由於佢患有血管收縮症，當年仲係年輕力壯，可以食得放肆，依家為咗健康要揀飲擇食，就算再見到間麵店，都唔會再見佢一「麵」喇。
慨嘆地區重建後失特色
Bernard慨嘆現時香港唔少地方已逐漸失去特色，灣仔、銅鑼灣等地區經歷重建後，好多都換晒大型商場同連鎖店，只剩下跑馬地尚算保留原貌。但佢坦言，喺市場推動下，舊事物難免有所犧牲。咁佢對「囍歡里」呢個名又點睇呢？佢就覺得個名幾好意頭，但如果大部分市民反對嘅話，政府就要小心諗清楚至好改名。