政情：峰爺細說穿膠花日子
創業係唔少年輕人嘅夢想，身家豐厚嘅金融服務界議員張華峰喺網上分享佢十年內創業做老闆嘅往事。七十年代初，當年二十歲嘅峰爺加入一間證券行做證券交易員，開始長達十年嘅打工生涯。峰爺當年日頭返證券行，放工幫人補習，夜晚仲會抽時間同屋企人一齊穿膠花。死慳死抵捱足十年，峰爺本紅簿仔終於儲到六十幾萬元，羨煞唔少同行。
雖然當時年紀輕輕嘅峰爺賺到第一桶金，但佢並冇攞呢筆錢買樓安居樂業，而係走咗去買證券行經營牌照，創立屬於自己嘅恒豐證券。峰爺建議年輕人唔好經常埋怨怕蝕底，反而要有敢於捱苦嘅心態，慢慢邊做邊學。
大肚腩畀人話可愛
鍾意周圍「獵食」嘅峰爺仲有一句至理名言，就係無論經濟環境如何，佢仍然堅持要食得好。事關佢覺得品嘗美食除咗能有效抵銷通脹外，經濟低迷時仲可以刺激市道，促進經濟復甦。雖然峰爺食嘢食到有個大肚腩，不過佢就完全冇唔開心，仲話大肚腩令人覺得佢分外親切可愛，令佢同其他人多咗話題。峰爺喺舊年立法會選舉後成功減去三十磅，但佢話依家成日要開會睇文件，行山減肥等大計統統難以實行，睇黎峰爺要減多三十磅真係遙遙無期。