中環出更：劉黃寧達設計鑽飾姊妹捧場
城中靚太愛沙尼亞共和國駐港名譽領事林建康太太林黃寧艷（Lianne）、家姊劉黃寧達（Leta）及太子珠寶鐘錶執董鄧宣宏雁一向感情好好，經常結伴出席大小派對。早前有日下午約三點，卓妮見到佢哋喺半島酒店商場現身，三人神態悠閒，沿途有講有笑，行出酒店後穿越馬路，直行直入彌敦道上嘅太子店舖。
原來Leta設計嘅第一批翡翠鑽飾面世，鄧太特登喺黃金地段獨家銷售其大作，當日三人食完飯後齊去睇吓市況，認真勤力。
卓妮跟住去開眼界，估唔到一向優雅高貴嘅翡翠，喺Leta大膽嘅設計下，竟然充滿朝氣及型格，仲有少少異族風情，風格同佢嬌柔淡定嘅形象好唔同。Leta話，首個系列歷經兩年時間設計，主題係大而誇張，但又不失漂亮，啱晒追求自我風格嘅新時代女性。卓妮見Lianne當日戴住一對設計簡約嘅翡翠吊墜耳環，更見優雅氣質，原來係Leta為佢度身訂造，真係有錢都買唔到。
卓妮