中環出更：創業「鋒雲」耍功夫顯廚藝
尋日亞洲國際博覽館好熱鬧，皆因藝人兼PO朝霆創辦人謝霆鋒（Nicholas）同阿里巴巴集團主席馬雲（Jack）等同場現身「鋒雲」論壇，向七千多名青年大談創業經驗與心得。二人作為兩大焦點人物，各施展混身解數，Nicholas即場下廚，Jack則表演太極拳。
點解Nicholas講創業會變咗煮嘢食？佢解釋，烹飪係一種修行，藉此領悟到合作及時間管理，皆因烹飪不能操之過急，要睇清楚有乜材料工具，烹調時間要控制得當，創業亦同樣道理。佢現場煮咗三道菜，其中一道係燴帶子及大蝦，大會邀請咗青年聯會候任主席霍啟剛上台試味。
將為人父 啟剛食帶子被笑
霍啟剛笑言，未試過喺七千幾人面前食飯，試食後大讚對方廚藝非常有水準，不料被主持揶揄：「帶子好吖，最緊要帶子，好意頭呀！」搞到將為人父嘅佢好尷尬。另一邊廂，「金句王」Jack引爆唔少笑彈，主持問佢創業至今有乜嘢失敗嘅經歷，佢答「太多了！」主持再問，咁最大嘅失敗呢？佢打趣道：「最大的還未到！」
創立內地最大網上購物中心嘅Jack坦言，創業唔係以賺錢為目標，而係使命感驅使。當初佢係見到顧客有需求，於是不斷改善服務滿足顧客。佢提醒創業者，無時無刻都要重溫當日創業時訂下嘅目標，而佢嘅目標就係透過互聯網，協助中小企經營生意。
唔少父母愛將子女送到海外留學，Jack就唔係咁贊同，佢話請人唔會睇佢來自邊間名牌大學，亦唔需要去讀咁多MBA（工商管理學士），因為讀書只係獲得知識，而創業係需要將知識轉化為智慧。同場演講嘅仲有摩根大通証券亞洲區副主席方方及盛匯商機創辦人李根興等。
卓妮