沒有最醜，只有更醜，講起消防處嘅醜聞，真係三日三夜都講唔晒。如果話畀大家知，負責滅火救人嘅消防員裝備五勞七傷，消防喉射水無力，消防車無法上路，通訊系統又頻頻死機，大家會有乜感覺呢？
唔係亂噏，近年消防處設備甩漏百出，採購程序立立亂，保養工作又馬虎，隨時救人變害人都有之。就講沙田消防局舊年斥資七百幾萬元買入嘅「變形金剛」新流動指揮車，加裝廁所同會議室後，車身竟然超出法定重量，搞到消防車「多廁一舉」唔出得街；○九年引入二百幾架新救護車，首批七十架車身過大，連救護站大閘都過唔到。
最經典係，○八年消防處用七千萬元買入十七架法國油壓升降台消防車，驗收時先至發現水泵力度不足，滅火水柱軟弱無力；其中一架車嘅消防喉更加喺訓練時突然斷開，仲未正式上陣已告報銷，大拿拿七千萬元公帑倒咗落鹹水海。新車得物無所用，消防處被迫用番廿幾年前買嘅老爺車，結果因為車輛老化，性能太差，升降台同水泵經常失靈，唔好話出動救人，連上斜都唔夠力，你話係咪笑話吖。
咁都未算吖，消防處年前以數碼化為名更換通訊同調派系統，「熄機」截斷傳媒消息來源，剝奪公眾知情權。點不知，熄機不成反死機，總共耗資近十億元嘅新系統經常跪低，被迫時光倒流改用人手聯絡，搞到裙拉褲甩，狼狽不堪。
消防處善財難捨，冤枉甘心，大手筆買入咁多唔等使嘅設備，反而喺人手方面諗縮數，喺港島總區試行新工時方案，透過精簡人手降低消防員工時，結果，當值人手少咗，工作量多咗，效率一落千丈。最離譜係，因為人手不足，前線人員病咗都未必請到假，隨時要帶病上陣，諗起都牙煙。
人手不足又好，買錯器材又好，講到底都係因為消防官僚高高在上，閉門造車，根本唔知前線實際需要。正如前線消防員質疑，消防處買設備前點解唔搵前線人員試下先呢？唔通高層坐喺辦公室覺得好用，就可以搵我哋條命較飛！
消防管理混亂，各界有口皆悲。消防工會前副主席黃國英力數消防處「六宗罪」，採購裝備程序冗長，可惜慢工出唔到細貨，由訂購物資到驗收器材都無專業人員跟進；而立法會議員梁國雄就認為，消防處應該檢討成個採購程序，聽取前線意見，保障市民安全，唔好成日買錯嘢。
計功夫茶話齋，呢啲批評可以講係對牛彈琴，消防官僚不務正業，充當政治打手，滋擾正義傳媒，打壓新聞自由，仲邊得閒救火救人呀！