嶺大播放三級片 為淫師表誤兒童

功夫茶細細個返學讀書,讀來讀去都係讀幾本書,從來冇諗過會有乜嘢其他冇咁悶蛋嘅教材。冇錯,老師間歇性會播放教育電視,之不過你知啦,呢種所謂電視同真正電視有好大分別,完全唔可以話係極盡視聽之娛。勢估唔到嘅係,今時今日嘅教材已經進化到播放電影,而且係金像獎名導演李安嘅作品。

嶺南大學持續進修學院有一個男老師喎,安排幼兒教育毅進學生上課期間睇電影。本來呢,睇電影增長見聞未嘗不可嘅,如果係睇《窈窕淑女》之類嘅經典電影,莫講話有機會學英文,連淑女優雅嘅言談舉止都有可能偷一偷師。問題係,嶺大嗰一個教育工作者播放嘅係《色,戒》,呢一套係含有裸露鏡頭嘅三級電影,咁就搞出一個大頭佛嘞。

嶺大持續進修學院有志於從事幼兒教育工作嘅文憑學生,今年三月喺佐敦分校上中文課嘅時候,助理講師播放未經刪剪嘅百分百足本《色,戒》,聲稱畀學生通過觀賞改編自文學作品嘅電影,培養讀寫中文以及聆聽普通話嘅能力咁話喎。喂,呢一套講述漢奸同間諜恩怨情仇嘅三級電影,雖然改編自才女作家張愛玲嘅文學作品啫,始終存在兒童不宜嘅大膽床戲喎,為人師表點可能變成「為淫師表」o架?強迫心智未成熟嘅小朋友觀賞男女主角赤身露體翻雲覆雨,實在有誤人子弟之嫌。好衰唔衰呢一個助理講師唔止畀學生睇三級電影,仲要求佢哋討論片中嘅性愛動作,比較女主角第一次同第二次床上表現嘅異同。若然功夫茶係十八歲卜卜脆嘅女學生,遇到咁令人充血嘅尷尬場面,話唔定會思疑呢一個人之患借頭借路性騷擾。

講起十八歲卜卜脆,大家都知道三級電影唔准播放畀未夠秤人士觀看o架啦,當日「睇電影學中文」嘅同學之中,真係有好多個未滿十八歲o架,你話唔係教壞細路都唔得啦!

有女學生睇過《色,戒》之後產生不安情緒,返屋企向家長反映,又向另一名老師表達不滿。教育局證實接到相關投訴,話會要求嶺大提交報告。至於嶺大嘅回應就係話,已經嚴厲警告負責老師,並向受到困擾嘅學生同家長致歉。

計功夫茶話齋,淨係嚴厲警告唔夠o架,實在有必要嚴厲處分。嶺大最近醜聞多多,又超收學生,又偷步收生,連委任新校長鄭國漢都搞到群情洶湧,嚴厲處分人之患有助擦亮招牌吖嘛。其次咯喎,嶺大向十八歲以下兒童播放三級片可能違反《淫褻及不雅物品管制條例》,包庇涉事老師成何體統呀!