有「囍帖街」之稱嘅灣仔利東街出晒名，本地流行曲《囍帖街》更加係以呢條街命名。不過「囍帖街」經市建局收回發展後，尋日就宣布將「囍帖街」重新命名為「囍歡里」。有人就隨即以「囍歡里」匯入流行曲歌詞表態，真係估唔到一個街名都可以激起無限創意。
「囍帖街」改名「囍歡里」，其中一個最大感觸嘅人可能就係為流行曲《囍帖街》填詞嘅填詞人嘞。填詞人借用流行曲《喜歡你》同《痛愛》嘅歌詞，話今次改名應該唔係「囍歡里，那雙眼動人，笑聲更迷人」，而係「囍歡里讓我下沉，囍歡里讓我哭」至啱。佢唔鍾意呢個新街名，好明顯啦。
一向創意無限嘅網民亦都以流行曲《垃圾》表態，話「被世界遺棄不可怕，囍歡里，有時還可怕」，亦有網民引用歌曲《一生愛你一個》，話「囍歡里，我最清楚這感覺」。甚至仲有網民話，以後被收回發展重建嘅街道可以改名做「逼走里」或者「趕絕里」添。
另外，有網民就喺社交網站發起「一人一電郵」行動，話要寫信去市建局同灣仔區議會，反對將「囍帖街」改名做「囍歡里」咁話。