政情：李柱銘盡顯漢奸本色

姓名唔清唔楚 話唔重要

李漢奸尋日接受一個網上電台電話訪問，原本只係講政改，但點知佢竟然自動波講斯諾登事件，仲話特首咁放走斯諾登好戇居，以後點同美國政府交代喎。而港府今次咁做，以後就冇人信，唔單止美國政府會報仇，其他國家都會咁話。對於港府話冇拘捕斯諾登係因為美國政府提供嘅名字同原本有出入，佢就話呢個並唔重要，因為人人都知道佢係咩樣，叫乜名，只要知道係嗰個人就得喎。真係難為佢講得出，姓名清楚都唔重要，乜嘢重要呢？唔通佢做大律師樣樣嘢都唔清唔楚嘅？真係枉佢成日講法治精神？

李漢奸仲話，根據港美嘅引渡協議，香港應該先向斯諾登提出起訴，判決完先決定係咪放人，而唔係人哋叫你審佢，你就大開中門咁放佢走。更何況美國都取消咗斯諾登嘅護照，點可以照放佢走，好明顯港府唔想留斯諾登喺香港，要使橫手請佢走。港府係咪唔知呀？李漢奸就回應，美國有線電視網絡都公布晒啦，無理由唔知。

留低特工 博泛民見報

不過，有立法會議員認同送斯諾登離開會容易啲解決問題，李漢奸就唔認同，話從政治角度睇可能係，但法治角度就一定唔係。而佢作為泛民主派，更覺得斯諾登唔走好過走，因為外國有幾何會不斷咁報香港嘅新聞，對佢哋泛民有咩唔好咁話。佢仲扮晒老實話，斯諾登去到俄羅斯更難走，因為俄羅斯會好想要佢手上嘅資料喎。李漢奸咁多意見，之前又唔見佢蒲頭講，依家就賊過興兵出嚟阿芝阿佐。

其實李漢奸多年前已喺北約轟炸中國駐南斯拉夫大使館嘅事件中，幫過美國講好話，仲話留意到北約同美國總統已對事件負責添。

而且佢又講過，如果被人話佢係漢奸，佢就會日日都做漢奸喎，唔怪得佢今次又做漢奸啦！