中環出更：周國豐買肉要問過老婆
身為律師嘅社交界名人周國豐（Brandon）出晒名係住家好男人，對太太黃泳霖（Jenny）錫到燶，對囝囝周禮淳嘅照顧更加係無微不至。我哋日前就喺銅鑼灣時代廣場地庫嘅一間連鎖超級市場內，見到西裝骨骨嘅Brandon一邊傾電話，一邊徘徊喺售賣凍肉嘅雪櫃前面，細心選購凍肉。
期間聽到Brandon喺電話問對方想買邊種肉類，然後左揀右揀，結果揀咗羊肉及雞髀肉各一包，準備到收銀處付款。Brandon話，啲肉係買畀愛兒食嘅，但為怕買錯咗，所以打電話問清楚太太先喎。佢話見咁啱經過銅鑼灣，記起呢間超市有出售有機肉類，所以專程過嚟買埋返屋企。
有機羊肉唔怕囝囝肥
問佢點解一定要買有機肉類呢？Brandon解釋，有機肉類冇咁多化學物同添加劑，希望囝囝食得健康啲，身體強壯啲。
至於點解會揀羊肉？佢話羊肉脂肪比其他紅肉相對較少，而佢仲要揀啲較瘦嘅羊腰肉，咁就唔怕囝囝變肥仔喇。咁貼心，呢個廿四孝爸爸認真抵讚。