中環出更：梁世華榮休 施榮懷「吻別」
擔任中華廠商聯合會行政總裁七年嘅梁世華（Paul），返到下月底就榮休，近期餞別宴排晒隊，為免撞期，廠商會一眾高層上周五提早同佢Farewell。臨別依依，阿Paul真情大解放，被會長施榮懷（Irons）強吻手背都唔嬲，咁啱佢詩癮大發，禮尚往來為幾位前會長寫詩，搞到班兄弟好唔捨得。
阿Paul人緣佳，新舊廠商會成員紛到賀，元老級嘅永遠名譽會長楊孫西、洪克協、尹德勝、黃友嘉捧場外，現屆副會長陳淑玲、吳永嘉、顏吳餘英，以及一眾青委成員都到齊，高朋滿座。平日好少唱歌嘅阿Paul就破例開金口，拉埋成班高層唱番首《朋友》及《愛拚才會贏》。
收施父墨寶 梁作詩回禮
全晚高潮就係送禮環節，Irons送上獨一無二嘅禮物，就係佢位書法家爸爸施子清嘅墨寶。陳淑玲都唔執輸，送咗幅漫畫。盛情難卻，阿Paul識做回禮，以洪克協、尹德勝、黃友嘉及施榮懷嘅姓氏作咗首詩，即場朗讀，博得全場掌聲。
即將離開廠商會，阿Paul趁機剖白真情，坦言離別心情好矛盾，雖然今後可以海闊天空任鳥飛，多啲時間遊埠歎世界，又可以睇書同聽歌，但做慣上班族幾十年，一下子停落嚟，相當唔慣。查實佢太太等咗老公退休好耐，阿Paul都知太太心意，承諾嚟緊會做「阿四」，陪太太Shopping、拎袋，又會陪打牌，認真體貼。
卓妮