如果功夫茶身邊原本有一個「斟茶遞水行政總裁」，後來取消咗呢一個職位，而功夫茶又冇甩頭甩髻表現正常，忽然之間有人提議恢復呢一個總字輩職位，大家係咪覺得好奇怪呢？當然好奇怪啦，一個職位取消咗都冇影響正常運作，證明呢一份工根本係冗贅閒職，舊職重設絕對係除褲放屁多此一舉。
偏偏人稱「廢官翻閹」嘅周一嶽有咁重口味嘅嗜好，佢真係好鍾意除褲放屁o架。上任不足三個月嘅周一嶽首次以平機會主席身份出席立法會政制事務委員會，一邊猛噴口水呻窮，一邊企圖浪費公帑。佢話喎，平機會即將冇錢使，今年財政仍算健全，但明年就要動用儲備，必須向政府申請增撥資源。被問到管治問題嘅時候，周主席話未來半年會內部諮詢，研究是否重新招聘行政總裁，專責處理平機會嘅內部行政事務。
行政總裁呢家嘢，原本係平機會成立初期設立嘅職位，相當於首長級第三級，月薪超過十萬元。○○年平機會以精簡架構以及節省開支為由取消咗呢一個職位，雖然特區政府先後兩次提出重設，不過都受到人權組織反對而胎死腹中。
換言之，自己被翻閹嘅周一嶽有意翻閹一個每年浪費百幾萬元公帑嘅閒職。「東方報業民意調查」結果顯示，對於周一嶽有意翻閹舊職，三成六受訪者認為係資源錯配；兩成八質疑佢巧立名目方便自己偷懶；一成九批評平機會冇將資源用於反歧視工作。
嗱嗱嗱，群眾眼睛是雪亮的真係一啲都冇講錯，市民一眼睇穿重設行政總裁職位係為咗方便周一嶽偷懶，證明民意不可侮，大懶蟲只好自取其辱。
喂，行政總裁一職每月薪酬十萬元，是否物有所值令人極度質疑，所以民意調查結果又顯示，四成一受訪者認為重設職位係本末倒置，令到平機會重現臃腫架構；兩成七指出無助改善財政狀況；一成五憂慮平機會變成行政主導。
其實講真吖，莫講話行政總裁係閒職，主席一職幾時試過效用宏大呢？平機會歷任主席醜聞多籮籮，一個王見秋係咁，一個鄧爾邦又係咁，家陣輪到循環再造嘅周一嶽上台打骰，仍然未能令人有信心。三成六受訪者認為佢能力不足，無法改善平機會亂象；兩成四擔心佢會令平機會變成肥上瘦下嘅大白象；另外兩成四冇信心佢會做好平等機會工作。
偷懶冇話唔得嘅，周一嶽若然覺得自己力有不逮，必須搵個行政總裁幫輕一下，不如咁啦，將自己嘅二十幾萬元月薪撥出一半為對方出糧囉，咁先至符合成本效益之道吖嘛！