政情：公民講場：貪曾廢鑊顏面何存

高官寓所僭建的新聞近年愈爆愈有，好似早幾日《好報》就獨家踢爆，康樂及文化事務署署長馮程淑儀喺跑馬地嘅住所天台僭建涼亭，將天台變成自己嘅私人後花園。好彩馮程淑儀知衰，而且唔係得個講字，報道出街後唔夠兩日，即時安排工人清拆涼亭，反應迅速又認真，算係污點中嘅亮點。

不過唔係個個高官都咁好，有啲人面皮成尺厚，僭建咗仲賴死唔認數，務求拖得一日得一日。好似貪曾前特首曾蔭權爵士前年被本報踢爆半山單位違例圍封露台，結果貪曾拖足兩個月至不情不願開展清拆工程。現任平等機會委員會主席、前食衞局局長周一嶽仲離譜，我哋舊年揭發其住所違規，竟以玻璃板圍封露台，但「廢官」周一嶽拖到今年四月底至施施然拆咗塊玻璃板，睇見都令人發火。