尋日港台《城市論壇》一度出現空櫈，而缺席嘅仲係建制派講者，原來大會一早搵過行會召集人林煥光、成員張志剛、立法會議員馬逢國、自由黨、經民聯同工聯會，統統都無人出席，結果一度得民建聯副主席張國鈞應約。唔通建制無將用，論壇缺悍將？
尋日建制派缺悍將嘅情況，其實係重複上星期四一個通識教育研討會嘅情節。話說上星期四教協同教院一齊搞咗個通識教育論壇，就出現請十個建制，十個婉拒嘅情況，最後好彩有第十一個建制派代表張志剛撐場。
不過尋日《城市論壇》就唔見佢，唔通係因為上次自爆行會無討論過政改時間表後要避下風頭？最後尋日捱義氣嘅，係前工程界立法會議員何鍾泰，大會仲當何博士係特別嘉賓咁簡介佢出場，事實又真係幾特別嘅。
喺尋日嘅論壇上，立法會議員劉慧卿喺突然發生嘅橫風橫雨下怒斥行會成員鄭耀棠早上喺電視台話政改諮詢押後至明年中都唔會太遲，點知一講到呢度現場嘅擴音器就失靈，原來係因為大雨得滯搞到跳晒掣，套用劉慧卿嘅說話模式：真係好離譜囉。